Maraqlıdır ki, qadın qüvvəsi qarşısında aciz qalan Bonapartın həyatında elə də çox zərif cinsin nümayəndəsinə rast gəlinmir. Onun ilk xanımı Jozefina olub. Yəqin ki, bir çoxunuz bu adı eşitmisiz. Napoleon hələ general olmamışdan əvvəl bu xanımla rastlaşmışdı. Josefinanın keçmiş həyat yoldaşı Boqarneni bir il əvvəl edam eləmişdilər. Bununla da, dul gözəlçə Barrasanın məşuqəsi olmaqdan başqa özünə təsəlli tapa bilməmişdi. Napoleonla tanışlığa qədər bu münasibətlər davam edirdi. Görkəmli sərkərdə ona pərəstiş edərkən, onunla münasibət yaradarkən evlənmək ağlının ucundan belə keçməmişdi. Bonapartın bu xanıma vurulması üçün onda bütün keyfiyyətlər var idi. Zadəgan təbəqəsindən olması, gözəlliyi, cazibədarlığı, generaldan dul qalması və daim möhtəşəm geyimlərlə diqqəti cəlb etməsi kobud bir hərbçinin necə xoşuna gəlməyə bilərdi?! Napoleon sonda Jozefinaya aşiq olur və getdikcə onda daha çox müsbət keyfiyyətlər tapmağa başlayır.