MİLLİ QƏHRƏMANLARIMIZ:
ŞƏHİDLƏR ÖLMƏZ, VƏTƏN BÖLÜNMƏZ..!!
Fərzəlİyev Pəhlivan Əhliman oğlu:
27 sentyabr 1958-ci ildə Füzuli rayonunun Qobu Dilağarda kəndində ana dan olub. Şuşa Kənd Təsərrüfatı Texnikumunu bitirib. İdmanla məşğul olan P.Fərzəliyev Şuşada keçirilən çempionatda Qarabağ çempionu adını qazanıb.
P.Fərzəliyev 1979-cu uldə orduya çağırılıb. 1986-cı ildə Orenburq Politexnik Universitetini bitirib.
BTR-n ekipaj komandiri olan Pəhlivanın taqımı Füzuli rayonundakı sərhəd kəndlərinin qorunmasında iştirak edib. Onun şücaəti nəticəsində Xələfşə kəndində bir erməni bölüyü və bir BTR məhv edilib. P.Fərzəliyev 1992-ci il aprelin 11-də həlak olub.
Evli idi. İki oğlu, bir qızı yadigar qalıb.
Azərbaycan Respublikası prezidentinin 8 oktyabr 1992-ci il tarixli 264 saylı fərmanı ilə baş leytenant Fərzəliyev Pəhlivan Əhliman oğluna ölümündən sonra "Azərbaycanın Milli Qəhrəmanı” adı verilib.
Füzuli rayonunun Qobu Dilağarda kəndində dəfn edilmişdir.
Bakı şəhərindəki qəsəbələrdən biri qəhrəmanın adını daşıyır.
Ibrahimov Rasim Səxavət oğlu:
18 aprel 1962-ci ildə Bakı şəhərində anadan olub. 1977-ci ildə C.Naxçıvanski adına Hərbi Məktəbə daxil olan R.İsmayılov 1979-cu ildək burada oxuyub. 1983-cü ildə Almaniyaya hərbi xidmətə göndərilib. 1988-ci ildə Bakıya qayıdan R.İsmayılov 1992-ci ildə o Füzuli rayonunun cəsur oğulları ilə birlikdə könüllü özünümüdafiə taboru yaradıb. Bu tabor Füzuli rayonunun kəndlərini mərdliklə qoruyurdu. Onların taboru 1992-ci il 26 iyun Tuğ kəndi uğrunda döyüşə girir. Onlarla erməni quldurunu məhv edən döyüşçülər digər dəstənin gəlib çatmamasından mühasirəyə düşürlər. Cəsur komandir R.İbrahimov döyüşçü dostlarını mühasirədən xilas edərkən özü düşmənin mühasirəsinə düşür. Ermənilərə təslim olmayan R.İsmayılov "Azərbaycan zabiti heç vaxt düşmənə təslim olmayacaq!”,-deyərək özünü qumbara ilə partladır.
Ailəli idi, iki övladı qalıb. Oğlu bu gün atasının yolunu davam etdirir.
Azərbaycan Respublikası prezidentinin 16 sentyabr 1994-cü il tarixli 203 saylı fərmanı ilə İbrahimov Rasim Səxavət oğlu ölümündən sonra "Azərbaycanın Milli Qəhrəmanı” adına layiq görülüb.
Bakı şəhərinin Şəhidlər xiyabanında dəfn edilmişdir.
Çilov adasında abidəsi ucaldılıb, qəhrəmanımızın adına burada bağ salınıb.
Məmmədov Seymur Qəhrəman oğlu:
8 sentyabr 1971-ci ildə Füzuli şəhərində anadan olub. 1978-88-ci illərdə Füzulidəki 2 saylı məktəbdə təhsil alıb. 1988-ci ildə Azərbaycan Politexnik İnstituna daxil olub. 1991-ci ildə hərbi xidmətə çağırılan S.Məmmədov hərbi xidmətini Almaniya və Ukraynada keçirib. Vətənə qayıtdıqdan sonra könüllü olaraq Füzulidəki özünümüdafiə taboruna yazılıb. S.Məmmədov bir neçə kəndin azad edilməsində, əsirlərin geri alınmasında qəhrəmanlıq göstərib. Qorxmaz qumbaraatan S.Məmmədov 1992-ci il 1 aprel tarixində Məlikcan kəndi uğrunda gedən döyüşlərdə hər birində 10 erməni yaraqlısı olan 15 post məhv ediir.
Subay idi.
Azərbaycan Respublikası prezidentinin 11 avqust 1992-ci il tarixli 131 saylı fərmanı ilə Məmmədov Seymur Qəhrəman oğluna ölümündən sonra "Azərbaycanın Milli Qəhrəmanı” adı verilib.
Bakı şəhərinin Şəhidlər xiyabanında dəfn edilib.
Oxuduğu məktəb onun adını daşıyır.
Zülfüqarov Elxan Qaçay oğlu:
29 iyun 1954-cü ildə Füzuli rayonunda anadan olub. 1969-cu ildə Bünyad Sərdarov adına 1 saylı məktəbin səkkizinci sinfini bitirib. Daha sonra Yevlax rayonunda orta təhsilini davam etdirən E.Zülfüqarov 1972- 1974-cü illərdə Ukraynada hərbi xidmət keçib. E.Zülfüqarov 1975-ci ildə təyinatla Novosibirsk şəhərinə göndərilir və orada milis işçisi olaraq fəaliyyətə başlayır.
Qarabağ hadisələri başlayanda E.Zülfüqarov vətənə qayıdır. 1992-ci ildə könüllü olaraq Azərbaycan ordusuna yazılan E.Zülfüqarov Laçın, Qubadlı, Zəngilan, Füzuli bölgələrində döyüşüb. 40-dan çox hərbi əməliyyatda iştirak edən Elxan xeyli erməni quldurunu məhv edib. Qısa müddətdə ona kapitan rütbəsi verilir və kəşfiyyat qrupunun komadir müavini vəzifəsinə təyin edilir. Erməni, rus dillərini səlis bilən E.Zülfüqarov 4 yanvar 1994-cü il yenidən kəşfiyyata yollandı onun əldə etdiyi məlumatlardan sonra 19 kənd azad edildi. Ermənilərin onlarla canlı qüvvəsi məhv edildikdən sonra saysız silah sursat ələ keçirildi. Döyüşçülərimiz hərbi texnikaları belə götürə bilmişdilər. 5 yanvar 1994-cü il Şükürbəyli kəndi uğrunda gedən döyüşlər zamanı E.Zülfüqarov qəhrəmancasına həlak oldu.
Ailəli idi, dörd övladı qalıb.
Azərbaycan Respublikası prezidentinin 16 sentyabr 1994-cü il tarixli 203 saylı fərmanı ilə Zülfüqarov Elxan Qaçay oğlu ölümündən sonra "Azərbaycanın Milli Qəhrəmanı” adına layiq görülüb.
Bakı şəhərində Şəhidlər Xiyabanında dəfn edilib.
Rəfiyev Faiq Qəzənfər oğlu:
22 fevral 1955-ci il Füzuli rayonunda anadan olub. 1972-ci ildə Qarakollu kənd məktəbini bitirib. 1973-75-ci illərdə Rusiyanın Arxangelsk vilayətində hərbi xidmətdə olub. 1990-cı il 20 Yanvar hadisəsindən sonra DİN-ə müraciət edir və təcrübəsi nəzərə alınaraq Xocavənd rayonuna sahə müvəkkili göndərilir. F.Rəfiyev Axullu, Tuğ, Qaradağlı kəndlərində əsl qəhrəmanlıq göstərib. 1992-ci il yanvarın 10-da Koçbəy kəndinin erməni quldurlarından təmizlənməsi zamanı F.Rəfiyev həlak olub.
Ailəli idi, iki övladı qalıb.
Azərbaycan Respublikası prezidentinin 2 oktyabr 1992-ci il tarixli 264 saylı fərmanı ilə Rəfiyev Faiq Qəzənfər oğlu ölümündən sonra "Azərbaycanın Milli Qəhrəmanı” adına layiq görülüb.
Doğulduğu Sarıcıq kəndində dəfn edilmişdir.
Lökbatan qəsəbəsindəki 166 saylı məktəb qəhrəmanımızın adını daşıyır.
Kərimov Bəşir Bəylər oğlu:
2 fevral 1976-cı ildə Füzuli rayonunda anadan olub. 1991-ci ildə səkkizinci sinfi bitirərək texniki-peşə məktəbində təhsilini davam etdirib. 1993-cü ildən döyüşlərdə iştirak edən B.Kərimov 19 may 1994-cü ildə Azərbaycan ordusunda xidmətə çağırılır. 1995-ci il 13-17 mart hadisələri zamanı o, Azərbaycan dövlətçiliyi əleyhinə çıxmış silahlı dəstənin zərərsizləşdirilməsində iştirak edir və bu qarşıdurma zamanı B.Kərimov həlak olub.
Subay idi.
Azərbaycan Respublikası prezidentinin 4 aprel 1995-ci il tarixli, 307 saylı fərmanı ilə Kərimov Bəşir Bəylər oğluna ölümündən sonra "Azərbaycanın Milli Qəhrəmanı” adı verilib.
Bakı şəhərinin Şəhidlər Xiyabanında dəfn edilib.
| 
